Epistel : Heber 5:5-10

Bahan Sermon Partangiangan di HKBP Padangsidimpuan

Selasa, 17 Maret 2015

Topik: Marlasroha mangoloi Hata ni Tuhan i

   &  Epistel : Heber 5:5-10

Patujolo

Halak Jahudi naung gabe Kristen do hasahatanni surat on na mangadopi ragam parungkion nang sitaonon ala ni Goar ni Kristus. Molo taparrohaon marojahan tu tradisi parugamoon ni Padan na Robi do angka na tarsurat di buku Heber on. Ditaringoti do di son ulaonni sahalak malim; na pasahat pelean situtungon, pelean pardosaon dohot pelean pardeangganan. Laos tradisi na masa di Padan na Robi on do diondolhon si Paulus patandahon ulaon ni Jesus na gabe sintua ni Malim jala umbalga sian i tahe, i ma mamelehon diriNa bahen tobus ni jolma. Jesus do na gabe anakni birubiru pola durus mudarna di hau pinorsilang bahen tobus ni portibi on. Marhite hamamate dohot haheheheonNa gabe ungkap dalan di jolma na tinobusna laho bongot tu harajaonNa.

Hatorangan

Toropan do jolma naeng marsangap jala diparsangap i, alai ndang piga jolma na rade mamparsangapi dongan na. I do bangko na sai torop dope jumpa dihajolmaon. Hape, ndada na ro sandiri hasangapon i diparngoluonta on. Ingkon mangadopi angka sitaonon manang pengorbanan. Marhite Debata na gabe jolma dibagasan Jesus, tangkas ma taida “laboratorium parngoluon”, ragam sitaonon, parungkilon dibolus Jesus, alai laos angka sitaonon i do mambahen Tuhanta Jesus marsangap ro di tingkion jala manontong salelengna. Laos on ma na gabe tudosan manang sorminan di angka na porsea, di angka nanaeng taruli dihamonangan, dihasangapon; rade manaon, manghophop. Alani, dalan mananda hadirionNi Jesus, adong piga siondolhonontong marhite turpuk on, i ma:

1.    Debata na gabe jolma so pola manadinghon hadebataonNa.

Jolma do pardosai do sasintongna ingkon manaon uhum parbueni pangalahona. Alai, ndang tarbahen jolma pardosai sandiri patupahon dalan haluaonna; ingkon Debata do marhite haroroNi si Palua i. Alai uju gabe jolma Debata dibagasan Jesus, ndada ditadinghon haDebataonNa, manang sangombas gabe so Debata Ibana. Ai nang uju gabe jolma songon hita Jesus i, ndang muba hasangaponNa, diusung do parluhutan jala marhagogoon jala tongtong do tongam (Heber 1:3). Alai, uju gabe jolma Debata dibagasan Jesus, ndada dihaginjanghon Ibana dirina manang dipangasahon, dipillit Ibana do ngolu songon hatoban na marhaserepon jala “..dirumari do diriNa..” (Pil 2:6-8). Tartangkup Ibana di porlak Getsemane, dipasiding Jesus do panguruponni si Petrus marhite na mandok na rade lobi sian sampuludua loksa surusuruan laho paluahon Ibana (Mat 26:52-54).  Marhite pangoloionNi Jesus, taboto ma, paboa ndang jolma biasa hape Sipalua i, ndada holan Debata na mian di banua ginjang Ibana. Debata na gabe jolma do Ibana, na ro tu portibi on, na gabe tuk mangkilala diragamni parsorion na marsingkatsoring na taadopi (dosa, hamatean, sibolis,dna). Gabe hahomion na so tarantusan do on molo mangasahon utokutok ni hajolmaonta, alai ndang maol hita mangantusi saluhutna i molo Tondi Parbadia manondangi roha ni jolma.

2.    Debata na gabe jolma, hataridaanNi PanobusionNa.

Olo Tuhanta i gabe jolma nang pe di ibana nasa huaso dohot hagogoon. Olo gabe jolma Ibana mandalani parngoluon songon na tadalani on: sipata mangadopi keterbatasan, male, mauas, marsak, pola biahaton jala bobonosan (Markus 14:33). Monang do Jesus mangadopi angka hamaolon i, ndang lari sian masalah Jesus manang mangalului hambalingan; saluhutna do diadopi Jesus sahat ro di ujungna. Isarana, uju tarsilang Jesus, diuji soldadu Rom do painumhon tuak na asom mardongan imut na gabe songon obat bius lao mangorui hinahansit na niae ni Jesus, alai ditulak Ibana do i ala ingkon adopanna angka hapariron dibagasan kesadaran hajolmaon, jala ingkon taluhononNa nasa hamaolon i. Lam tangkas ma hilalaonta, ndada Debata na hundul dihabangsaNa, alai Debata na tuat tu portibion do Ibana bahen haluaon.

3.    Debata na gabe jolma, i do hataridaanNi asini rohana.

Unduk do Jesus tu Ama i, songon i ma nian jumpang haunduhon ni angka na porsea i tu Jesus, jala ingkon sun denggan do rohanta songon Ama na di banua ginjang na sun denggan i (Mat 5:48).

Panimpuli

Las ma sian nasa rohanta mangoloi Tuhan i. Gabe angka bohini Jesus (imitatio christi ) na patar ma hita diportibion, na tuk marhamonangan di angka parungkilon, jala marhabasaon di angka hamoraonta. Alani, tadalani jala taadopi ma saluhut ngoluon dibagasan haunduhon dohot pangoloion tu Ama i, asa dapot pangurupion hita (2 Korint 3:18).