Jamita Partangiangan Pangungkapon 15:1-4

Topik: Puji ma Debata na sun timbul jala na songkal.

   &   Pangungkapon 15:1-4

Patujolo

Pangungkapon 15 on marisihon ende ni birubiru, na patubegehon hamonangan na marrumang/bersifat tu saluhut/universal. Birubiru i patupahon ulaon na balga holan laho manait jolma sian torutoru ni uhum ni Debata. Aha pe na masa “dihongkop”/dipertaruhkan birubiru i do pola sahat tu na agoan hosa. Dipuji torop surusuruan humaliang habangsa i do pambahenan ni Birubiru i, jala marsoara na gogo do nasida mandok: “na tama do Birubiru naung tarbunu i manjalo hagogoon dohot hamoraon, dohot hapistaran, dohot sahala, dohot hamuliaon dohot hasangapon dohot pujipujian! (Pangk 5:12). Songon dia do asa parsidohot hita mangendehon pujian si songon i?

Hatorangan

Ay.1. “dungi huida ma di banua ginjang tanda na asing....pitu surusuruan...

Banua ginjang sai digombarhon do inganan manang hadirionNI Debata na so tardodo ni pingkiran, alai na pasti simbol kedudukanNi Debata do i. Molo dung ditaringoti taringot tu banua ginjang, tangkas ma disi hadirionNa, huasoNa, hagogoonNa songon i nang holongNa. Molo digombarhon, tong so adong do nasa huaso na adong ditano nang na ditoru ni tano on laho manaluhon manang mangalo huasoNi Debata. Molo dipabotohon Debata parhuaso manang parBanua ginjang, naeng pabotohonontong panguhum do Debata, na manimbangi marhite hatigoran dohot hasintonganNa.

“...Surusuruan...”. Dung diida si Johannes diungkap Debata Banua ginjang i, diida ibana ma angka surusuruan laho paujunghon paruhuman nang haporsuhon. Ditongos Debata surusuruanNa paujunghon nasa rimas. Nasa paraloannia angka na porsea di Tuhan i nunga marujung be dibagasan hagogoon na sian Tuhan i.

Ay.2.”..hudia..laut...na marsaor api..”. Tuk do pingkiranta manggombarhon adong laut na marsaor api? Marragam pingkiranta na boi putikan manghatai taringot tu laut. Mangihuthon Sejarahni turpuk on, Laut manggombarhon ondamondam/ancaman hamatean. Boi do ingotonta jala hilalaonta pardalananan dohot pangkilalaanni bangso Israel uju di tano Misir. Di na ni leleni bangso Misir nasida, laut na gok habiaran i do dipangke Debata paluahon nasida sian pangaleleon ni Misir. Sasintongna hamatean do ujung ni nasida molo manimbung boti tu laut i, tung so tarpatudos do bidang ni laut maradophon gogo manang torop nasida boi mambola jala mardalan sian laut i. Alai i ma di mata ni hajolmaonta, memang dang mungkin boi jolma mambola laut i laos maruduran mardalan sian i. Alai, di Debata sude do bo i masa, nasa na tinompa ni Debata unduk do tu Debata. Nang pe nunga rongom hamatean i talpe dijoloni Israel, alai laut na dietong hamatean i gabe dalan tu haluaon; baliksa gabe sosadu ni Misir do dibondut aek laut i.

Alani marhite pandohan “..laut..sorminan laut api..” marlapatan:

1.  Hamatean i jonok do i manait ngolu ni jolma i

2.  Hamaolon na niaeni angka na porsea i boi do umborat sian na niaeni bangso Israel uju diarhatoban bangso Misir.

3.  Api na ro sian banua ginjang i ma tanda pangaramotionNi/kehadiran Debata

4.  Gabe sada sorminan ma laut i manang barita na paboahon torop jolma na porsea naung mate martyr di si, baliksa torop angka na porsea naung monang marhite laut i

5.  Dijoloan ni ari lam tangkas ma ise angka siparmonang i, i ma na so olo tunduk tu nasa huaso haholomon na di portibion.

Ay.3-4, upah hamonangan. Angka na manahan dihaporseaon sahat ro di ujungna marupa hamonangan na sian Tuhan i. Molo taingot si Musa tangkas ma taingot haluaonNi Israel sian Misir naung laut rara. Songon i muse molo taingot muse ende taringot tu Birubiru i, hatindanghononta ma muse naung monang Tuhan Jesus na mamelehon diriNa songon birubiru tu pamotongan. Sian peristiwa Sejarah Israel dohot uju mangolu Jesus diportibion, godang na suhar tu rohani portibion, alai laos i do dipangke Debata gabe dalan hamonangan. Laos i do naeng igilon ni Debata sian angka na porsea i, manghaporseai Debata na tuk pamasahon hamonangan sian angka na so tardodo ni portibi on.

Refleksi:

Sude jolma do las rohana umbege jala mengalami molo gabe siparmonang ngoluna diportibion nang dingolu sogot. Alai aha do dasor manang songon dia do asa boi daion hamonangan na hinalomohonNI Debata? Parnampunahon ma dingolum Ende na tau pamonanghon!

Mateus 28:16-20. Hananaek

Sermon Evanggelium tu Hananaek, Kamis 14-05-2015

Topik: DongananHu do rasirasa ro ajal ni hasiangan on.

     Evanggelium : Mateus 28:16-20

Patujolo

Somalna diportibion, molo naeng borhat sada uluan, natoras, manang dongan sandiri pe i; sai martona do tu na tinadinghonna i, tung pe parborhatna i parsatongkinan. Lumobi ma molo parborhat na i mangharingkothon partingkian na lumeleng, tontu ondol situtu do nasa tona tadinghononna siulahononni angka na tading i. Alani, di angka na manjalo tona i ringkot situtu umboto rumang ni tona i jala mangulahonsa. Dos tu si ma situasi na niadopanni angka sisean, manaek Tuhan Jesus tu Banua Ginjang dilehon tona sibotoon jala siulahonna. Alai, marhite Debata na immanuel, na maha hadir, ingkon tangkas do botoonta, ndada na hea ditadinghon Debata angka sisean, nang portibion, lumobi angka na porsea sahat ro ditingkion; holan rumang ni kehadiranNi Debata mangebati, manise angka na porsea na diportibion nunga marhite ragam cara. Dibagasan Tondi do ibana jotjotan ro manise angka na porsea i.

Domu tu tona nang hata partadingan, ganup na porsea ingkon tangkas do umboto, ia ulaon na mardila sisean manang na gabe sisean, ndada holan tu si sampulusada halak sisean i. Tusude naporsea do dilehon turgas i (kewajiban), pinomat parnampuna di dila sisean, pangalahon sisean; ai sude do na porsea marhatopothon Tuhan Jesus i guru dingoluna, alani tangihon jala ulahon na pinangidona, boha ma carana, on ma ingkon tangkas tarida diturpuk on.

Rasrasan na jompok diturpuk:

Ayat 16-17. Siean na tingkos, tangkas mamboto inganan dohot sumber ni parsiajaran na tama. Jala ingkon marulakulak manjalo pola sahat tu mandiori bona ni parsiajaran i asa lam tu torasna. Di Tuhan Jesus do dapot inganan parsiajaran sisongon i, ala immanuel do ibada, jala Tondi i do Ibana na boi mangajari jala pajumpang dohot hita diganup situasi ni ngolunta. Na ringkot sian angka sisean haradeon na olo marsiajar, benget diparbinotoan na sai marroan i, jala dipadao diri na sian roha biar dohot hagangguon, lumobi ma halosokon. I do sisean na dihalomohon Tuhan i.

Ayat 18-20. kehadiranNi Jesus do mambaen taantusi nasa na sian hasintongan, nasa na sian HarajaonNa na adong di portibion lumobi ma na sian Banua Ginjang. Ringkot tangkas botoonta, dipangke Debata do portibion gabe inganan keberlangsungan hasasautni harajaon Banua Ginjang, tung pe godang haramunon, hagaleon na jumpang do pe diportibion. Alai, diangka na olo gabe siseanNa, mardila sisean tarbaen saut do harajaon Banua Ginjang i tung pe diportibion dope hita boi do daion jala hilalaonta i. Naringkot sijaloonNi Tuhan i sian hita, haoloonta marguru tu Ibana, haoloonta diparsuruonNa, jala hatangkasonta/kemampuan marningot na pinodahonNa. Hibul ni rohanta dipangoloion laos saurdot do dipandonganionNa pola sahat tu na ro ajal ni hasiangan on.

Impola ni turpuk:

1.    Namarhatutuhon dirina siseanNi Debata, na pinangke Ni Debata, ingkon las ma rohana, ala parnampuna ibana di guru na marasing sian angka guru na diportibion. Jesus i ma guru na singkop, na so hea sala, na so mardosa, pola olo Ibana gabe jolma. Molo tangkas do dirimangi angka na porsea keunggulan/hasurungan ni Guru on, nda patut ma nian dibagasan biar jala las roha marnampuna di guru sisongon i?

2.    DipasahatGuru i do tu angka na porsea i, tu hita TonaNa, jala marhapatean tu Haluaon/keselamatan do tona on. Na sa barita napaluahon, na tingkos, na sintong, na pahisarhon; i do sintuhu ni Tona i naingkon tolhas pola di dok tu ujung ni portibion, dimulai ma sian bagas ta be las mangararati ma i tu humaliang (pat.2 Tim2:2).

3.    Dilehon Guru i do tu hita sinjata mardila sisean, mangajarhon haluaon, hasintongan i, ima HataNa. Hata i do hangoluan, dimulana i nunga adong Hata i, i ma Debata, jala Jesus i sandiri do i. Haporseaonta marsigantung tu Ibana dibagasan Hata i, i do parhitean jala na manontuhon hita manjalo jala manguba portibion.

4.    Adong do Jaminan na so hea marujung, na so hea tarleanni portibion jaminan sisongonon pola masa berlaku ni jaminan i sahat ro diujung ni hasiangan on, mansai ganjang do partingkianna, pola dang tarsuhat ni portibion tanggal kadaluarsani padonganionNa, penjaminanna.

Disaluhut na parbinotoanta jala hatauonta mangula songon siseanNi Tuhan Jesus taruli ma hita disilehonlehon ni Tondi i (Gal 5:22-23) nang pe so marrumang materi marhite parbue ni Tondi i tarjalahi hita do, jumpang hita do materi i songon parbue ni haporseaon i. Alai umbalga sian i nunga tolhas tu hita muse i ma hangoluan na manontong i (Mateus 16:26, pat Markus 10:29-30).

Sipahsorhusoron

Bohado rumang ni pemuridan naung dipatupa hurianta marsadasada jala aha do angka parhitean na boi patolhashon pemuridan i? Ringkot pahusorhusoronta on, asa unang holan balga, sangap, holong di BIBEL sajo Guru na Badia i digoar.

ACARA PARMINGGUON DI NA MONDING

ACARA PARMINGGUON

DI BAGAS NI KELUARGA SIBAGARIANG/Br NAINGGOLAN

Diparmonding ni Amanta SETIA SIBAGARIANG. (A.Nemsi)

Sitataring, Minggu,  25 Januari 2015

 

PANGARADEON

Tangiang nahohom………………………………10 detik

1.   Marende BE .No. 223:1+3 “Husomba Ho Tuhan” 

Husomba Ho Tuhan tangihon au SangkapMu ma tongtong pasaut tu au

Lam ganda baenon ni i, holong ni rohangki Sai lam gandai holong tu Ho

Di na targogot au hansit huae Ho na mangapul au tu Ho au lao Haposanki do Ho, Ho Sipangolu do Sai lam tambai holong tu Ho

2.    Votum-Introitus: Marhitehite Goar Ni Debata Ama dohot AnakNa Tuhan Jesus Kristus dohot Goar Ni Tondi Parbadia, na tumompa langit dohot tano on. Pardenggan basa do Jahowa, tau partanobatoan di ari hagogotan jala ditanda do angka na marhaposan tu Ibana. Haleluya (diendehon: Haleluya, haleluya, halelu…ya)

Martangiang ma hita: Ale Tuhan Debata , pargogo naso hatudosan! Ho do na manjou hami jala Ho do na papunguhon angka na pinillitMu tu huriam na badia i. Mauliate ma rohanami, ala naung dipasahat Ho hami tu anakMu, asa Ibana nampuna hami. Asi ma rohaM, sai pargogoi ma hami mangulahon na nidok ni hataM, asa domu hami dohot naung tolhas tu lambungMu. Amen.

3.   Marende BE.No.501:1 Sai Ditogutogu Jesus

Sai ditogutogu Jesus tondingki na gale i, Asa unang be au ganggu dipanoguonNa i, maradian do rohangku, Molo Huhaposi i nang sitaonon dipassonggop sai jonok do Tuhanki. Nang sitaonon di pasonggop, sai jonok do Tuhanki.

4.   Jamita Psalmen 68:20-21

Hata Toba	Bahasa Indonesia
20 Pinuji ma Tuhan i ganup ari! Dokdok pe * dipaporsanhon tu hita, Debata do mangurupi hita. Sela! 21 Debata ni angka hatuaon do Debatanta i, jala guru di Tuhan Jahowa do angka haluaon sian hamatean.	20 Terpujilah Tuhan! Hari demi hari Ia menanggung bagi kita; Allah adalah keselamatan kita. S e l a 21 Allah bagi kita adalah Allah yang menyelamatkan, ALLAH, Tuhanku, memberi keluputan dari maut.

5.   Marende BE No.452:1 Na ro pandaoni Bolon i

Na ro pandaoni bolon I, I ma Tuhanta Didaoni na marsahit I, hisar dibahen

Jesus     Jesus.  Uli ni barita I, las ni roha Jesus Bo-lon I ! Sai di pu-ji ro-hang-ki Je-sus, Je-sus.

6.   Koor:

7.   Marende BE.No.736: 1 Jesus Haposanhu

Jesus haposanku unang ma pasombu, Au di hapunjungan di na so mardongan. Ho tongtong donganku dipardalananku, Jesus haposanku unang au pasombu. Ho tongtong donganku di pardalananku, Jesus haposanku unang au pasombu.

8.   Tangiang Pangondianon sian Hasuhuton

9.   Marende BE No.508: 1  Sai Patogu rohangki

Sai patogu rohangki, ale Jesus Tuhanki Golom dohot tanganmi au dipardalananki Molo loja au dison pargogo i tongtong. Dok tu au : Hutogu pe ho tu surgo i muse.

10.              Tangiang sian Parhalado

11.              Marende BE No.428:1-3   Ho na loja ho na sorat  (Papungu Pelean)

Ho na loja ho na sorat, pos roham di Debatam! Di na hansit, dina borat, dipapita do roham. Unang ganggu rohamuna dipandokNi Debatam. pasautonNa bagabaga, pos roham di Debatam.

Asa unang ho be talu dibahen haholomon I, Bereng Jesus I Tuhanmu, bernit na tinaonNa i. Unang…….

Alani padao arsakmu, hot ma tiop Tuhanmi. Tu na denggan do ditogu saluhut na masa i. Unang…

12.    Tangiang Pelean – Panutup- pasupasu.

Acara Partumpolon

Acara Partumpolon di si:

Ronal Saut Agustin Simorangkir, SE

DOHOT

Rodiana Hutabarat, A.M.Keb

HKBP Padangsidimpuan Ressort P.SIDIMPUAN, Jumat,  27  Februari 2015

 

Pangaradeon

Suratsurat na porlu tu Partumpolon (Surat Parhuriaon, Surat Tardidi, Surat Malua) asa dipasahat ma tu jolo.

Hata Pamuhai dohot Joujou Parsombaon tu Debata

U   :Hamu dongan sahuria na hinaholongan ni Tuhanta. Nunga rap hita mangudurhon anak dohot boru ni hurianta laho manangkasi dohot patumpolhon sangkapnasida laho manjalo pasupasu pardongansaripeon tu tingki nanaeng ro. Rap ma hita manangkasi dibagasan ruhut dohot holong na sian Tuhanta, asa denggan jala tulus mardalan sangkapnasida nanaeng mardongan saripe. Hamuna anak dohot boru ni hurianta na pinarhamaol ni Debata. Na ro do hamu nuaeng tu bagas joro ni Tuhanta on, pabotohon dos ni rohamuna tu huriani Tuhan ta i. disangkapi hamuna do nuaeng umpungka pardongansaripeon i. ala ni i asa hombar pardongansaripeonmuna i songon pardongansaripeon ni halak Kristen, patupaonta ma nuaeng partumpolon tu hamu na dua di jolo ni tuhanta dohot di jolo ni huria on. Tapangido ma panuturion sian Tuhanta, asa marture ulaonta sadar on, nang tu tingki nanaeng ro. Marende ma hita.

1.      Marende BE No.815:1-2   “Uli do tingki nahohom”

Uli do tingki na hohom di joloni habangsa ni, Amanghu na rade tongtong manjalo pangidoanhi Ai di na marsak rohangki sai diapuli tondingki Malua sian jorgong I ditingki martangiang i.

Uli do tingki na hohom, sonang martua rohangkon, Tongtong masihol rohangkon, lao martangiang na hohom. Au raphon na badia I, sai naeng marnida bohiMi Tuhanku Sipartobus I, ditingki martangiang i.

2.      Votum-Introitus-Tangiang. U:Uluan, R:Ruas,P:Pangoli, O:Oroan

U      :Marhitehite Goar ni Debata Ama, dohot Goar ni AnakNa Tuhan Jesus Kristus dohot Goar ni Tondi Porbadia na tumompa langit dohot tano on, tapungka jala tapatupa Pangundukhonon ni Parpadanan ni si Ronal Saut Agustin Simorangkir, SE dohot Rodiana Hutabarat, A.M.Keb on tu Debata, amen. Mandok mauliate ma hamu siala saluhutna. Ai i do dipangido sian hamu marhitehite Kristus Jesus. Haleluya.

U   :Martangiang ma hita. Ale Debata Amanami na di banua ginjang. Mauliate dohot pujipujian ma disombahon rohanami na pungu on tu Ho, ala tongtong do diramoti Ho hami, lumobi ma anak dohot boru ni huriaM si Ronal Saut Agustn Simorangkir, SE dohot si Rodiana Hutabarat, A.M.Keb on sian na metmet sahat ro di sadari on. Nunga dos tahi nasida nadua, naeng mardongan saripe hombar tu tingki naung binuhulMu dinasida. Na ro do nasida nuaeng tu huriaM, mangido asi ni rohaM, asa tulus sangkapnasida i dibagasan lomo ni rohaM, jala hombar tu ruhut parhuriaon ni Huria Kristen Batak Protestan.

R   :Paloas ma naposoM laho manulingkiti parsitutuon ni holongnasida, asa marojahan tu lomo ni rohaM pardongansaripeon nasida.

U   :TondiM Tondi Porbadia i ma na margogoihon nasida, asa sian nasa roha nasida, mangalusi sungkun-sungkun na naeng sipasahaton tu nasida.

U+R       :Tangihon ma tangiang pangidoannami on, ala ni Anak Haholongan ni rohaM, Tuhan Jesus Kristus Tuhannami. Amen.

3.      Koor

4.      Marende BE No.701:1   Tu Ho do au marpadan” 

Tu Ho do au marpadan, O Jesus Tuhanki, asa burju haposan au diadopanMi. Sai Ho ma mandongani au diulaonki, ajari pargogoi ma au didalanki.

5.      MANJAHA SURAT PARPADANAN

U   :Hamu angka dongan sahaporseaon! Sungkunonnami ma nuaeng, di jolo ni Debata dohot dijolomuna, parsitutuon ni si Ronal Saut Agustin Simorangkir na naeng mardongan saripe dohot si Rodiana Hutabarat, ala ni i jongjong ma hamu na dua! Jaha hamu ma Surat Parpadananmuna i.

(DIJAHA PANGOLI DOHOT OROAN MA SURAT PARPADANAN I)

U   :Nunga tangkas dijaha jala diantusi hamu nadua be isi ni Surat Parpadanan i, gabe padan na so boi oseonmuna, saleleng mangolu hamu tu joloan ni ari on. I ma padan na ingkon radotanmuna andorang nang dung ojak hamu gabe sada ripe na imbaru di tonga ni huria i. na manungkun ma ahu nuaeng tu ho pangoli Ronal Saut Agstin Simorangkir di jolo Ni Debata dohot di jolo ni dongan na pungu di son, sian nasa roham do naeng mardongansaripe tu si Rodiana Hutabarat

P  :Olo, sian nasa rohangku do, naeng mardongansaripe dohot ibana.

U   :Boha, adong dope pangambati di sangkapmuna, naeng mardongan saripe?

P  :Ndang adong be.

U   :Mauliate ma! Hamu angka dongan sahuria, nunga tangkas husulingkiti parsitutuon ni si Ronal Saut Agustin Simorangkir, jala nunga itabege alusna. Hita ma sitindangi, diparsitutuonna tujoloan on.

R    :Sai dipargogoi Tuhan i ma ibana, pasauthon padanna di jolo ni Tuhan i dohot tu huriaNa.

U   :Na manungkun ma ahu nuaeng tu ho inang Rodiana Hutabarat di jolo Ni Debata dohot di jolo ni dongan na pungu dison, sian nasa roham do naeng mardongan saripe dohot si Ronal Saut Agustin Simorangkir?

O  :Olo, sian nasa rohangku do, naeng mardongan saripe dohot ibana.

U  :Boha, adong dope pangambati di sangkapmuna naeng mardongan saripe?

O :Ndang adong be.

U :Mauliate ma. Hamu angka dongan sahuria, nunga tangkas husulingkiti parsitutuon ni si Rodiana Hutabarat, jala nunga itabege alusna. Hita ma sitindangi di parsitutuonna tu joloan on.

R    :Sai dipargogoi Tuhan i ma ibana, pasauthon padanna di jolo ni Tuhan i dohot tu HuriaNa.

U   :Angkup ni i, di hamu dongan sahuria, tangkasannami do hamu saluhutna, adong diboto hamu, dipasahat manang dijalo pangoli dohot oroan on hata ni na asing, na boi mangambati sangkap ni rohanasida, naeng mardongan saripe?

R    :(sadasada ma disungkun, 1.Natoras, 2.Dongan sahuta) ADONG (molo adong); NDANG ADONG (molo ndang adong).

U   :Mauliate ma. Antong, ro ma hamu nadua tu jolo on manandtangani Surat Parpadananmuna. Sai unang ma muba, sai unang ma mose, sai tiur pardongan saripeonmuna tu joloan ni ari on.

(Pangoli dohot Oroan ro tu jolo manandatangani Surat Parpadanan)

U   : Ro ma hamu nang natoras ni pangoli dohot natoras ni oroan, saksi sian paranak dohot parboru, suang songon i sintua lingkungan, gabe sitindangi dohot manandatangani Surat Parpadanannasida. (Dung sidung ditandatangani, dipatangkas ma Tingting I, Tingting II, ari ni pamasumasuon, laos dipabotohon ma tu natorop).

6.      Marende BE.No.238:2+5   “Ihuthon Ahu sude hamu”   BL.93

Sai Ahu panondang di hamu di dalan hangoluan. Naeng unang lilu be hamu, dao dohot hamagoan. Ahu parhitean di hamu tu hasonangan situtu.

Ndang tarpatupa hami i dipingkir rohamuna. Unang mabiar ala ni, ai Ahu do donganmuna. taluhononKu musu i sai pos ma rohamu disi.

7.      Jamita, PODA 8:13.

Biar mida Jahowa do manghagigihon na jat, roha haginjangon dohot hajungkaton; pangalaho na jahat pe dohot pamangan getegete pe na huhagigihon do. (Takut akan TUHAN ialah membenci kejahatan; aku benci kepada kesombongan, kecongkakan, tingkah laku yang jahat, dan mulut penuh tipu muslihat)

8.      Marende BE.No.766:1-3    “Padan na uli”     (Pasahat Pelean)

Padan na uli “Ho ndang hulupahon”, Ndang pola mabiar au di ngolungki, Nang pe holom do dalan siboluson, Ro do hatiuron sian langit i. “Ho tung so huhalupahon Audo manogihon Au do mangondihon Ho tung so huhalupahon, Au do margogoihon pos ma rohami”.

Padan na uli “Ho ndang hulupahon”. I do huhaposi las ma rohangki, Tondong nang dongan ndang tarpangasahon, Holan Tuhan Jesus haporusanki.            “Ho tung so halupahon ………”

-------------ORGAN-----------------

Molo diungkap surgo tu tondingku, Salpu ma luhut na hangalutonki, Tarbege ma soara ni Tuhanku, “Naposo, haposan, bongot ho tusi”. “Ho tung so halupahon …”

9.      Parsuruon marsihohot di Padan

U   :Nunga simpul be ulaonta di Parpadanan ni anak dohot boru ni hurianta sadari on. Rap ma hita manangianghon asa dipargogoi Tuhanta nasida  mangulahon padannasida sadari on.

R   :Ale Tuhan, asi rohaM, paatulus ma sangkap nauli on ditongatonganami. Ramoti ma hami saluhutna, lumobi ma anak dohot boru ni huriaM na marpadanan sadarion.

U   :Ingot hamu ma, na marpadan do hamu di jolo ni Debata, sai tongtong ma hamu marpangunsandean tu Tuhanta Jesus Kristus, Raja ni Huria i. jala, sai Ibana ma tanda di angka dalanmuna, asa marolopolop tondimuna.

10.   Tangiang Pelean-Ale Amanami-Pasupasu-Amen.

Bulung ni gumba tu bulung ni singgolom

Padan unang muba, na denggan i tagolomgolom.